Árlegt söluátak Menntunarsjóðs Mæðrastyrksnefndar Reykjavíkur hefst þriðjudaginn 5. maí, með sölu á Mæðrablóminu sem er Leyniskilaboðakerti þriðja árið í röð.
Allur ágóði af sölu Mæðrablómsins rennur óskertur til Menntunarsjóðsins sem styrkir tekjulágar konur til mennta. Markmið sjóðsins er að efla styrkþega til mennta og auka þannig möguleika þeirra á að finna góð störf sem geta tryggt þeim og fjölskyldum þeirra öruggari framtíð. Á síðasta ári veitti sjóðurinn 52 konum styrk til náms en frá upphafi stofnunar hans árið 2012 hefur sjóðurinn veitt fleiri en 250 styrki til náms.
Söfnunarátak Menntunarsjóðs hefst formlega 5. maí í garðinum heima hjá frú Vigdísi Finnbogadóttur kl.12 með móttöku þar sem frú Vigdís Finnbogadóttir, fyrrverandi forseti Íslands, frú Eliza Reid, forsetafrú og Sigríður Thorlacius, söngkona, taka á móti kertum frá stjórn Menntunarsjóðsins, Þórunni Árnadóttur, vöruhönnuði, og öðrum velunnurum sjóðsins.
Líkt og undanfarin ár eru frú Vigdís Finnbogadóttir, fyrrverandi forseti Íslands, og frú Eliza Reid, forsetafrú, sérstakir stuðningsaðilar átaksins en nú bætist Sigríður Thorlacius, söngkona, í þeirra hóp. Allar hafa þær valið sinn leyniskilaboðatexta í kertin tileinkaðan mæðrum.
Til styrktar átakinu í ár hefur Sigríður Thorlacius jafnframt tekið upp lagið Litli tónlistarmarðurinn eftir Freymóð Jóhannsson (Tólfta september), sem dreift verður ásamt nýju leiknu myndbandi á samfélagsmiðlum.
Kertin eru í postulínsskálum og þegar kveikt er á þeim og vaxið bráðnar koma smátt og smátt í ljós skilaboð á botni skálarinnar. Þórunn Árnadóttir er hönnuður kertisins og gefur hún vinnu sína nú þriðja árið í röð. Alls geta kaupendur valið um fimm mismunandi texta. Kertin eru kjörin tækifærisgjöf, sérstaklega á mæðradaginn, og bjóða upp á óvenjulega og skemmtilega upplifun.
Kertin verða til sölu í verslunum Pennans Eymundssonar á höfuðborgarsvæðinu og á Akureyri, í Epal í Skeifunni og Kringlunni, Snúrunni, Eldum Rétt, Nettó og hjá Heimkaup.is, í tvær vikur, frá 5.-19. maí.
Hægt er að styrkja sjóðinn með frjálsum framlögum í banka: 515-14-407333, kennitala: 660612-1140. Nánari upplýsingar má finna á heimasíðu Mæðrastyrksnefndar eða á Facebook síðu Menntunarsjóðsins.
