Í drögum að áliti hæfisnefndar kemur fram að Sigurður Tómas Magnússon, dómari við Landsrétt, sé talinn hæfastur umsækjenda til að hljóta embætti dómara við Hæstarétt. Umsækjendur höfðu frest þar til í gær að senda inn andmæli við álitið og má reikna með að nefndin skili endanlegri niðurstöðu fyrir helgi.

Fréttablaðið skýrir frá þessu í dag. Auk Sigurðar sótti Sigríður J. Friðjónsdóttir, ríkissaksóknari, um embættið auk Landsréttardómaranna Aðalsteins E. Jónassonar, Davíð Þórs Björgvinssonar og Jóhannesar Sigurðssonar.

Ingveldur Einarsdóttir var skipuð í embætti dómara við Hæstarétt í upphafi árs en þá voru hún og Davíð Þór og Sigurður Tómas metin hæfust. Nú er Sigurður Tómas hinsvegar talinn hæfari en Davíð Þór.