Nýlega varð hinn 79 ára Julián Sánchez fyrir því óláni að detta inni á baðherbergi heima hjá sér  í Madrid og mjaðmagrindarbrotna. Sjö dögum síðar lést hann. Ekki af völdum brotsins heldur einfaldlega af því að hann var lagður inn á sjúkrahús á röngum tíma.

„Faðir minn var fluttur á sjúkrahús og átti að gangast undir mjaðmaaðgerð en lést af völdum kórónuveiru.“

Sagði sonur hans og alnafni í samtali við El Mundo.

Sánchez var lagður inn á Severo Ochoa de Leganés sjúkrahúsið í Madrid þann 16. mars þegar COVID-19 faraldurinn var af alvöru að skella á borginni og sjúkrahúsinu.

Álagið hefur verið gríðarlegt á sjúkrahúsinu og á upptökum frá La Sexta sjónvarpsstöðinni sést að læknar verða að þræða sér leið á milli sjúklinga sem liggja og sitja á göngum sjúkrahússins.

Sumir verða að bíða klukkustundum saman ef ekki dögum saman í biðstofum því það er ekkert pláss fyrir þá á sjúkrahúsinu. Fólk er því alltof nærri hvert öðru og smitleiðir því auðveldar fyrir veiruna skæðu.

Sánchez er ekki eini sjúklingurinn sem hefur smitast af veirunni á sjúkrahúsum landsins og látið lífið af hennar völdum.