Fyrir 4,5 milljörðum ára lenti jörðin í árekstri við gríðarlega stóran loftstein eða litla plánetu. Áreksturinn var svo harður að tunglið varð til við hann. En hann hafði einnig þau áhrif að eftir stóð jörðin án nokkurs vökva. Vísindamenn hafa lengi haft þá kenningu að næstu milljónir ára hafi loftsteinar úr ytri lögum sólkerfisins dunið á jörðinni og að þeir hafi innihaldið vatn, þannig hafi heimshöfin myndast.

Kristoffer Szilas, jarðfræðingur hjá jarðvísindadeild Kaupmannahafnarháskóla, segist nú geta staðfest þessa kenningu. Hann hefur fundið 3,8 milljarða ára gamalt „fingrafar“ eftir sérstaka tegund loftsteins. Þetta kemur fram í tilkynningu frá Kaupmannahafnarháskóla. Í henni er haft eftir Szilas að vísindamenn hafi fundið sérstakt ísótóp fingrafar af fyrsta efninu á jörðinni og að það segi til um hvernig jörðin var samansett í upphafi og hvaðan vatnið í höfunum kom. Þannig hafi stór ráðgáta um jörðina okkar nú verið leyst.

Vísindamennirnir fundu loftsteininn á Grænlandi og fengu fyrrgreinda niðurstöður við rannsóknir á honum.