Illugi Jökulsson rithöfundur segir að það ætti frekar að vísa Sigríði Á. Andersen dómsmálaráðherra úr landi en Mary og Haniye. Í pistli Illuga á Stundinni segir hann að fyrirlitning í orðum Sigríðar um að það komi ekki til greina að endurskoða mál sem dúkki upp tilviljanakennt í umræðinni, sé óboðleg:

„Það ætti eiginlega að vísa Sigríði Andersen úr landi, frekar en hinum barnungu stúlkum Mary og Haniye og aðstandendum þeirra. Með hrokafullum og hryssingslegum yfirlýsingum sínum hefur Sigríður sýnt að hún hefur ekki þann félagsþroska og þá mannlegu samkennd með öðru fólki sem ætti að vera skilyrði þess að fá að fara með vald,“

segir Illugi, það hafi svo sannarlega komið til greina hjá Sigríði að hafa að engu álit dómnefndar um dómaraefnin í Landsrétt fyrr á þessu ári. Þar að auki hafi hún sjálf dúkkað upp sem ráðherra í „innanflokksmambói í Sjálfstæðisflokknum“:

Mál þessara stúlkna hafa ekki „dúkkað hérna upp tilviljanakennt“. Þau hafa komist í sviðsljósið vegna þess að þótt við getum kannski ekki veitt öllum skjól sem hingað vilja leita, þá er alveg óvenjulega grimmilegt að vísa þessum stúlkum og fólkinu þeirra burt.

Sjá einnig: Segir orð dómsmálaráðherra dapurleg: „Fólk fyrir fólk en ekki fólk fyrir kerfi“

Illugi segir að auðvitað ætti ekki að vísa ráðherra úr landi, það hafi verið stílbragð, en hann geti hins vegar fullvissað hana um að fáir vilji hana sem ráðherra, hún ráði ekki við það:

Hún veldur Íslandi að vísu miklu meira og afdrifaríkari tjóni en bæði Haniye og Mary munu nokkru sinni gera. Samt væri of mikið af því góða að vísa henni úr landi.

En það á hiklaust að vísa þessum rudda úr ráðherrastól. Hún á ekki að fara með vald yfir öðru fólki, því hún ræður ekki við það.