Kínverskur maður, sem var að fara í fyrstu flugferð sína, ákvað að kasta myntum inn í hreyfil flugvélarinnar, svona nokkurskonar „gangi þér vel“ myntum. En þetta reyndist þessum 28 ára manni dýrt því hann þarf að greiða flugfélaginu Lucky Air sem svarar til 2,8 milljóna íslenskra króna í bætur.

Flugfélagið neyddist til að hætta við flug með vélinni þar til flugvirkjar höfðu skoðað hreyfla hennar eftir að myntir fundust nærri öðrum hreyflinum. Maðurinn, Lu Chao, játaði að hafa kastað nokkrum myntum í hreyfilinn þegar hann var að ganga um borð í vélina á Anqing Tianzhushan flugvellinum í febrúar á síðasta ári.

BBC skýrir frá þessu.

Auk sektarinnar var Chao í gæsluvarðhaldi í 10 daga á meðan lögreglan rannsakaði málið. Fyrir dómi greip hann til varna og sagði að flugfélagið hefði átt að vara farþega við að ekki mætti kasta mynt í hreyfilinn.

Mál hans er ekki einsdæmi í Kína því mörg álíka mál hafa komið upp þar á síðustu árum.