Ólafur F. Magnússon, tónlistarmaður, læknir og fyrrverandi borgarstjóri, og Kolbrún Sjöfn Matthíasdóttir gengu í það heilaga á nýársdag. Vígslan fór fram í Bústaðakirkju við dýrðlega athöfn að sögn tónlistarmannsins.
Í samtali við DV segir Ólafur að nýársdagur hafi verið sérstaklega valinn því að dagurinn sé honum ákaflega kær, ótengt því að um sé að ræða upphaf á nýju ári.
„Nýársdagur er 70 ára brúðkaupsafmælisdagur foreldra minna og ég finn alltaf fyrir því að foreldrar mínir séu hjá mér á þessum degi,“ segir Ólafur og bætir við að giftingin hafi átt sér frekar stuttan aðdraganda.
„Við vorum bæði búin að ákveða það að gifta okkur aldrei aftur en þessi dagur sótti á mig og þótti mér kært að virða minningu foreldra minna,“ segir Ólafur og bætir við á léttum nótum: „Við giftum okkur að sjálfsögðu í kirkju enda erum við hvorki nútímafólk né trúleysingjar.“
Ólafur segir það skemmtilega staðreynd að Pálmi Matthíasson, frændi hans, hafi gefið þau Kolbrúnu saman.
„Það var vel viðeigandi, en ég og Pálmi erum fæddir í sama herberginu á Oddeyrargötu 24 á Akureyri. Hann er fæddur 21. ágúst 1951 og ég 3. ágúst 1952.“
Auk þeirra hjóna og séra Pálma voru þær Anna Sigga Ólafsdóttir og Louisa Einarsdóttir viðstaddar, en sú fyrri er dóttir brúðgumans og seinni eiginkona Vilhjálms Guðjónssonar. Þær voru svaramenn þeirra hjóna. Að lokinni athöfn fóru hin nývígðu hjón í hátíðarkvöldverð á Vox á Hilton hóteli í félagi við sína nánustu.
„Vilhjálmur Guðjónsson lék fallegt lag á saxófón í lok athafnar, sem hann samdi til eiginkonu sinnar. Og Friðrik Grétarsson kvikmyndaði athöfnina og tók að auki formlegar brúðkaupsmyndir, eins og honum er lagið,“ segir Ólafur, sem gengur bísperrtur og umlukinn hamingju inn í nýtt ár.
