Frá 2018 hefur Hannah Mouncey spilað með ástralska kvennahandboltalandsliðinu en kynskiptaferli hennar hófst 2015. Hún hét áður Callum Mouncey og spilaði með ástralska karlalandsliðinu. Hún hefur skilgreint sig sem konu frá 2016. Engar reglur stóðu í vegi fyrir að hún gæti spilað með kvennalandsliðinu á HM í Japan en það gerðu hins vegar liðsfélagar hennar og þjálfari liðsins.

Um viku áður en mótið hófst var tilkynnt að Hannah yrði ekki með þrátt fyrir að hún hafi leikið með liðinu í undankeppninni í Asíu.

Í bloggfærslu á Star Observer skýrir hún frá málinu.

„Ég get staðfest að ég var ekki valin í liðið því hópur leikmanna, sem naut stuðnings þjálfarans, vildi ekki að ég færi í bað með hinum leikmönnunum eða notaði sama búningsklefa og þeir fyrir og eftir leiki. Þetta var eina ástæðan fyrir að ég var ekki valin sagði þjálfarinn.“

Hún segist ekki reikna með að fá símtal aftur frá landsliðsþjálfaranum og sé ferli hennar með landsliðinu því lokið. Hún mun halda áfram að spila með félagsliði sínu, Melbourne Handball Club.