Undirréttur í Kaupmannahöfn hefur dæmt atvinnupókerspilara í 30 mánaða fangelsi fyrir að hafa svindlað á öðrum spilurum. Einnig voru 26 milljónir danskra króna, um 470 milljónir íslenskra króna, gerðar upptækar hjá honum.

Maðurinn kom njósnabúnaði fyrir í tölvum andstæðinga sinna og gat því fylgst með þeim og þeim spilum sem þeir fengu þegar þeir spiluðu á netinu.

Það var gamall vinur hans sem kærði hann til lögreglunnar en svindlið stóð yfir frá 2008 til 2014. Maðurinn áfrýjaði dómnum strax til Eystri-Landsréttar og krefst sýknu.

Þrjú vitni komu fyrir dóm og sögðu að maðurinn hefði játað fyrir þeim að hafa komið njósnabúnaði fyrir í tölvum annarra spilara.