Bandaríski milljarðamæringurinn Bill Gates er stórhuga í þeim verkefnum sem hann tekur sér fyrir hendur og það nýjasta er engin undantekning. Hann ætlar að setja mikið fé í verkefni sem miðar að því að þróa nýja aðferð til að nýta orku sólarinnar.

Eftir því sem segir í frétt CNN þá heitir fyrirtækið á bak við verkefnið Heliogen. Það ætlar að gjörbylta þeim aðferðum sem við höfum notað til þessa til að nýta sólarorku. Lausnin felst í því sem má kannski einna helst líkja við geislabyssu úr vísindaskáldsögumynd. Fjölmörgum speglum verður komið fyrir á jörðu niðri en þeir eiga að endurvarpa geislum sólarinnar í einn lítinn punkt. Gervigreind mun stýra speglunum til að þeir snúi alltaf að sólinni. Ef hægt verður að nota alla speglana til að beina sólargeislum í einn lítinn punkt verður hægt að mynda allt að 1.000 gráðu hita en það er um fjórðungur þess hita sem er á yfirborði sólarinnar.

Fyrirtækið telur að með þessari aðferð sé hægt að hætta að nota jarðefnaeldsneyti sem orkugjafa í iðnaði en árið 2010 er talið að iðnaður hafi losað um fimmtung af öllum gróðurhúsaloftegundum, sem losaðar voru, út í andrúmsloftið.

Mikil leynd hvíldi yfir verkefninu þar til í síðustu viku þegar það var kynnt til sögunnar. Bill Gates hefur þó verið viðloðandi verkefnið um langa hríð og hefur sett mikið fjármagn í það. Hann telur það lofa mjög góðu.