Efnisveiturnar Netflix og HBO tapa stórum fjárhæðum á að fólk „lánar“ öðrum lykilorðin að aðgangi sínum eða sameinast um að kaupa eina áskrift. Nú ætla efnisveiturnar að reyna að stöðva þetta og fleiri efnisveitur og sjónvarpsstöðvar hyggjast fara sömu leið.

Bloomberg segir að árlega verði efnisveitur og áskriftarsjónvarpsstöðvar af um 6,6 milljörðum dollara vegna deilingar lykilorða og ólöglegrar dreifingar á efni þeirra. Reiknað er með að upphæðin geti verið komin í 9 milljarða dollara eftir 5 ár ef ekkert verður að gert.

Fyrirtækin leita því nú leiða til að loka á þetta. Ein leið, sem hefur verið nefnd til sögunnar, er að láta notendur skipta reglulega um lykilorð eða að þeir fái kóða sendan í farsíma sína þegar þeir ætla að horfa. Ef þetta dugir ekki til hefur að sögn verið íhugað að láta fólk skrá sig inn með fingraförum.