Dómstóll í Ástralíu hefur sakfellt tónlistarmanninn Craig Lembke í einu umfangsmesta fíkniefnamáli sem komið hefur upp í landinu. Lembke var gómaður síðla árs 2017 með rúmlega 500 kíló af kókaíni sem falin voru í báti sem Lembke sigldi frá Taítí til Ástralíu.
Dómstóllinn taldi sannað að Lembke hafi átt að fá í sinn hlut fyrir smyglið upphæð sem nemur rúmum 40 milljónum króna á núverandi gengi. Söluverðmæti efnanna hefði numið mörgum milljörðum króna ef þau hefðu ratað á götur Ástralíu.
Lembke neitaði sök í málinu og sagðist ekki hafa haft hugmynd um að efnin væru falin um borð í bátnum. Dómstóll taldi skýringar hans ótrúverðugar. Lembke þessi var nokkuð vinsæll saxófónleikari og þá var hann í sambandi með þekktri ástralskri sjónvarpskonu, Susie Elelman, áður en hann var handtekinn.
Dómur í málinu verður kveðinn upp 16. desember næstkomandi.