Myndirnar sem fylgja þessari frétt eru teknar af sjálfboðaliðum hjá mannúðarsamtökunum Feed Our Homeless í Dublin á Írlandi. Þær sýna 5 ára dreng sem er heimilislaus og verður að treysta á matargjafir samtaka á borð við Feed Our Homeless til að fá mat og drykk.

Myndirnar hafa vakið mikla athygli víða um heim og hafa skapað umræðu um fátækt og þann mikla fjölda fólks sem er heimilislaus á Írlandi. Í færslu samtakanna á Facebook er drengurinn nefndur Sam. Segir að hann hafi komið til samtakanna ásamt móður sinni til að fá mat skömmu eftir að skóladegi hans lauk. Hann sé því miður ekki eina barnið sem hafi þurft á aðstoð samtakanna að halda.

Mæðginunum hefur nú verið útvegað húsaskjól í Dublin en engin eldunaraðstaða er í húsinu. Feed Our Home segja að ástandið í húsnæðismálum borgarinnar sé til háborinnar skammar og hvetja ráðherra húsnæðismála til að segja af sér.

Í nýrri skýrslu kemur fram að rúmlega sex þúsund fullorðnir og tæplega þrjú þúsund börn séu heimilislaus í Dublin og búi á götunni eða hafi verið útvegað húsaskjól til bráðabirgða.