Dipu Ahad, músímskur borgarfulltrúi í Newcastle, segir að svo virðist sem atvikið í morgun, er ekið var yfir fólk sem var að koma frá Eid-bænasamkomu, hafi verið furðulegt slys en ekki hryðjuverk. 42 ára gömul kona situr í haldi lögreglunnar en hún ók rauðum Nissan-bíl upp á gangstétt og yfir fólkið.

Sex slösuðust og þar af er ástand þriggja alvarlegt. Af þeim þremur eru tvö börn og eru þau í gjörgæslu. Lögregla hefur lýst því yfir að hún telji atvikið ekki hafa verið hryðjuverk en málið verði rannsakað nánar.

Borgarfulltrúinn Dipu Ahad mætti á vettvang. Segir hann í viðtali við Sky að fólk sé í miklu uppnámi yfir þessu en í bænahópum múslima á svæðinu sé nú beðið fyrir bata fólksins sem slasaðist. Ahad segir:

„Það varð ljóst að þetta var furðulegt slys og slys gerast. Vonandi mun enginn láta lífi en samfélagið biður fyrir þeim sem urðu fyrir áverkum i slysinu.“

Sjá fyrri frétt um málið

Nýjustu fréttir herma að konan undir stýri segist hafa verið að reyna að bremsa þegar hún ók á fólkið og hún hafi stigið á bremsuna.