Kennari við Newberries-grunnskólann í Hertforshire í Bretlandi hefur verið rekinn eftir að hann „grínaðist“ um það við nemendur sem aðhyllast gyðingatrú að hann myndi „senda þá í gasklefann“ ef þeir kláruðu ekki verkefnin sín. Daily Mail segir frá.

Kennarinn á að hafa látið þetta út úr sér á fimmtudag þegar hann kenndi tíu ára börnum. 28 voru í bekknum og voru ellefu af þeim gyðingar. Að sögn foreldra sagði kennarinn orðrétt:

„Það er best fyrir ykkur að vera fljót að læra því annars sendi ég ykkur í gasklefann.“

Þegar að einn nemandi gekk á kennarann með að þessi athugasemd væri óviðeigandi þá sagðist hann vera að grínast og baðst afsökunar. Kennarinn bað börnin einnig um að þaga yfir þessu. Nemendurnir sögðu hins vegar foreldrum sínum frá og fóru fréttirnar eins og eldur í sinu um skólann með þeim afleiðingum að kennarinn var rekinn á föstudag. Gengu sumir foreldrar það langt að hóta að kippa börnum sínum úr skólanum ef kennarinn yrði ekki látinn fara.

Neyðarfundur var haldinn meðal skólastjórnenda á fimmtudagskvöld. Hægt var að segja kennaranum upp svo skyndilega þar sem hann var verktaki og ekki samningsbundinn.

Skólinn er í Radlett og ganga 203 nemendur í skólann á aldrinum fjögurra til ellefu ára. Átta þúsund manns búa í Radlett og er fjórðungur íbúa gyðingar.

Eftir að kennarinn var látinn fara gaf skólinn út fréttabréf til að róa foreldra. Var ítrekað í fréttabréfinu að skólinn fagni fjölbreytileikanum.