Gwyneth Paltrow er ofurjákvæð manneskja. Hún segist læra af öllum mistökum sínum og nýta þau til að þroska sig. Hún segir að skilnaður sinn og tónlistarmannsins Chris Martin hafi verið ótrúlega sársaukafullur en hún hafi verið staðráðin í því að gera hann jákvæðan. Hún tók því meðvitaða ákvörðun um að einbeita sér að því að hugsa um allt það góða í fari síns fyrrverandi eiginmanns og lagði mikið á sig til að varðveita vináttu þeirra. Paltrow giftist Chris Martin árið 2003 en þau skildu árið 2016. Þau eiga saman Apple, þrettán ára, og Moses sem er ellefu ára.

Paltrow er ekki bara fræg fyrir kvikmyndaleik, hún er einnig þekkt fyrir heilsusamlegan lífsstíl og hefur verið ófeimin við að miðla ráðum til annarra á lífsstílssíðu sinni Goop. Þeim ráðum hefur verið misvel tekið og nýlega varaði læknir við uppskrift á síðu hennar og sagði hana stórhættulega þar sem í henni væru eiturefni.

Sjálf segist Paltrow verða fyrir ómaklegri gagnrýni vegna áherslna sinna á heilsusamlegt líferni. „Konur mæta yfirleitt mótbyr, sérstaklega ef þær njóta velgengni og líta vel út,“ segir hún. Hún segist ekki fylgja jafn ströngum lögmálum varðandi heilsusamlegan lífsstíl og hún gerði áður. Hún segir aldur sinn skýra það, en hún er fjörtíu og fjögurra ára gömul. Hún fastar ekki jafn oft en borðar ekki morgunmat, fyrsta máltíð dagsins er hádegismatur, væntanlega afar heilsusamlegur.