Elísabet II Bretadrottning er kannski ekki sú manneskja sem flestir tengja við nútímatækni enda er hún vel við aldur og ansi íhaldssöm á mörgum sviðum. En hún hefur samt sem áður látið koma hraðbanka fyrir í Buchingham Palace þar sem hún býr að jafnaði.

Þetta kemur fram í nýrri heimildamynd um leyndarmál konungshallanna, Secrets of the Royal Palaces, sem Channel 5 sýnir nú í september. Fram kemur að það sé Coutts bankinn sem reki hraðbankann en hann veitir ofurríku fólki þjónustu. Ólíklegt er þó talið að drottningin hafi notað hraðbankann enda er hún aldrei með reiðufé á sér.

Í fyrsta þættinum, þar sem er einmitt fjallað um hraðbankann, kemur einnig fram að sundlaug séu í Buckingham Palace og megi starfsfólk hallarinnar nota hana. Þar er einnig pósthús fyrir starfsfólkið og læknastofa þar sem er hægt að framkvæma bráðaaðgerðir ef þörf krefur.

775 herbergi eru í Buckingham Palace, þar af eru 52 svefnherbergi.