Bæjarráð Akureyrar gerir alvarlegar athugasemdir við skipan starfshóps sem vann drög að grænbók um stefnu stjórnvalda í málefnum flugrekstrar og flugtengdrar starfsemi á Íslandi.

Málið var rætt á fundi bæjarráðs í morgun.

Athugasemdirnar snúa einkum að því að svo virðist sem enginn utan höfuðborgarsvæðisins sitji í starfshópnum. „Auk þess sitja engir fulltrúar sveitarfélaga í starfshópnum en bæjarráð telur eðlilegt að Samband íslenskra sveitarfélaga ætti fulltrúa í starfshópnum enda um mikið hagsmunamál fjölmargra sveitarfélaga að ræða,“ segir í bókun bæjarráðs.

Þá mótmælir bæjarráð þeim skamma fresti, yfir sumarmánuðina, sem gefinn er til að koma með athugasemdir í samráðsgátt vegna Grænbókar, en drögin eru nú til umsagnar á samráðsgátt stjórnvalda.

Í drögunum má finna greiningu á stöðunni í flugrekstri og flugtengdri starfsemi hér á landi. Annars vegar er um að ræða greiningu á stöðunni í málaflokknum í dag en einnig tillögur að áherslum til framtíðar.

Í athugasemd Akureyrarbæjar á vef samráðsgáttar kemur fram að bæjarráð telji að samfélags- og byggðasjónarmið séu ekki höfð að leiðarljósi við vinnuna. Þá er lýst vonbrigðum með að þvert á stjórnarsáttmála ríkisstjórnarinnar þá virðist ekki vilji til að opna fleiri gáttir inn í landið. Lítil ástæða sé til að flokka aðra flugvelli en Keflavíkurflugvöll sem millilandaflugvöll.

„Akureyrarbær hefur fengið frest til þess að senda inn umsögn um málið og mun gera það á næstu dögum,“ segir í athugasemdinni.