Á föstudaginn fundust Bryer Schmegelsky og Kam McLeod látnir í skóglendi í Kanada en mikil leit hafði staðið yfir að þeim í 15 daga. Þeir voru grunaðir um að hafa myrt þrennt, tvo karla og eina konu. Málið vakti mikla athygli og óhug en Bryer og Kam voru vinir, ungir að árum og ekki annað vitað en þeir væru bara ósköp venjulegir ungir menn.

En eitthvað virðist hafa bjátað á hjá þeim, að minnsta kosti er lögreglan sannfærð um að þeir hafi myrt þrjár manneskjur. Fórnarlömbin voru háskólakennarinn Leonard Dyck og parið Lucas Fowler og Chynna Deese. Öll voru þau myrt á vegum úti í Bresku Kólumbíu.

Í fyrstu taldi lögreglan að Bryer og Kam hefðu einnig verið myrtir en tilkynnt hafði verið um hvarf þeirra. En þegar kafað var ofan í málin skipti lögreglan um skoðun og taldi Bryer og Kam bera ábyrgð á morðunum. Mikil leit hófst að þeim og naut lögreglan meðal annars aðstoðar hersins við hana.

Bíll þeirra félaga fannst brunninn í um hálfs annars kílómetra fjarlægð frá staðnum þar sem lík Leonard Dyck fannst.

Leitin náði yfir um 5.000 km áður en lík félaganna fundust. Daily Mail segir að fjölmargar vísbendingar og sönnunargögn hafi fundist á þessum síðasta dvalarstað félaganna. Það var blár svefnpoki og árabátur sem kom lögreglunni á sporið og varð til þess að líkin fundust. Þar fundust einnig leifar af svínakjöti og appelsínur. Það bendir til að það hafi verið síðasta máltíð þeirra.

Lögreglan hefur ekki sagt neitt um dánarorsök félaganna en vinnur að rannsókn málsins í heild af miklum krafti.