Leikkonan Milla Jovovich tilkynnir það á Instagram að hún og eiginmaður hennar, kvikmyndagerðarmaðurinn Paul W.S. Anderson, eigi von á sínu þriðja barni saman. Milla, sem er 43ja ára, segir fyrstu vikur meðgöngunnar hafi verið erfiðar, sérstaklega í ljósi þess að hún missti síðasta fóstur sem hún gekk með.
„Ég sveiflaðist á milli alsælu og algjörrar skelfingar þegar ég komst að því að ég var ólétt fyrir þrettán vikum. Vegna aldurs míns og fósturlátsins vildi ég ekki tengjast þessu hugsanlega barni of fljótt,“ skrifar Milla við mynd af sér með kúluna út í loftið. Hún bætir við að hún hafi verið hóflega bjartsýn fyrstu vikurnar.
https://www.instagram.com/p/B04Dt3mHeZu/
„Ég og fjölskylda mín höfum beðið með öndina í hálsinum eftir niðurstöðum úr alls kyns prófunum og við höfum eytt mestum tíma okkar á læknastofu. Sem betur fer erum við komin yfir óvissutímabilið og vitum nú að við eigum von á annarri stúlku.“
Milla lofar aðdáendum sínum á Instagram að hún ætli að leyfa þeim að fylgjast grannt með meðgöngunni. Hún gekk að eiga Paul í ágúst árið 2009 og fyrir eiga þau dæturnar Ever, ellefu ára og Dashiel, fjögurra ára.
