Kona nokkur hvetur aðra femínista innan Facebook-hóp íslenskra femínista til að láta krók koma á móti bragði gegn hefndarklámssíðunni Chansluts. Ítrekað hefur verið fjallað um síðuna undanfarin ár í íslenskum fjölmiðlum en þar birta menn nektarmyndir af ungum og jafnvel ólögráða stúlkum nær undantekningarlaust í óþökk viðkomandi.

Allir notendur síðunnar eru nafnlausir og lítið sem ekkert eftirlit. Því hefur hún starfað nánast óáreitt um margra ára skeið. Lögregla hefur áður fullyrt að síðan sé til rannsóknar en ekki verður séð að það hafi skilað neinu. Friðrik Smári Björgvinsson, fyrrverandi yfirlögregluþjónn hjá lögreglunni á höfuðborgarsvæðinu, sagðist til að mynda árið 2017 ekki vilja gefa upp hvort síðan sé til rannsóknar eða ekki. „En við þekkjum síðuna. Það er alls konar efni sem hefur ratað þarna inn,“ hafði Vísir eftir honum.

Nú virðast femínistar hafa fengið sig fullsadda af þessari síðu og hyggjast nota nafnleysið á síðunni gegn níðingum. „Ég er svo fokking þreytt á að chansluts sé ennþá uppi, fullt af stafrænu kynferðisofbeldi, gagnvart fólki frá 11 ára, algjörlega fokking viðbjóðslegt og lögreglan gerir ekki skít,“ segir fyrrnefnd kona.

Hún segist hafa fengið klikkaða hugmynd, að birta nöfn kynferðisofbeldismanna sem ekki hafa verið dæmdir á þessari síðu. Þar sem allir séu nafnlausir þar þá ætti ekki að koma til meiðyrðamáls. „Svo, ég er með klikkaða hugmynd, fyrst við erum allar kærðar fyrir að opinbera nauðgara og aðra ofbeldismenn á fb, gerum það þá á chansluts? Tökum powerið yfir chansluts, eignum okkur það, fyllum það af myndum af gerendum. Því fyrst þeir fá að komast upp með að deila stafrænu kynferðisofbeldi þá ættum við að komast upp með að vara annað fólk við ofbeldismönnum. Ég ætla að byrja hlaða inn um leið og ég kemst í tölvu, feel free to join the movement,“ segir konan nú síðdegis.

Hugmyndin hefur fengið gífurlega góð viðbrögð innan fyrrnefnds femínistahóps. „Mér finnst þetta snilldar hugmynd! Skulum sjá hversu langan tíma það tekur að yfirvöld geti skyndilega gert eitthvað í þessu,“ segir til að mynda ein kona.

Þráður á Chansluts hefur nú þegar verið stofnaður og þar segir: „Jæja stelpur, látið vaða. Sendið inn screenshot af hinum allra verstu strákum sem þið hafið lent í svo aðrar lendi ekki í þeim. Ef þeir áframsendu nektarmyndir, neyddu ykkur til þess að gera eitthvað eða voru bara almennt fávitar, sendið allt skítkast á mig og styðjum hvor aðra!!“