Mexíkóski eiturlyfjabaróninn Joaquin „El Chapo“ Guzman var nýlega dæmdur í ævilangt fangelsi og til 30 ára að auki af dómstól í New York í Bandaríkjunum. Þá var hann einnig dæmdur til að greiða 12,6 milljarða dala í bætur vegna kókaínsmygls hans til Bandaríkjanna. Á föstudaginn var hann fluttur í Florence fangelsið í Colorado en það er hámarksöryggisfangelsi og stundum nefnt Alcatraz Klettafjalla.

Hann hafði verið vistaður á leynilegum stað í New York þar til hann var fluttur til Colorado. Denver Post skýrir frá þessu og hefur þetta eftir lögmanni hans, Jeffrey Lichtman. El Chapo, sem er 62 ára, á enga lúxusdvöl í vændum í fangelsinu sem er sagt það öruggasta í Bandaríkjunum.

Hann þarf að dveljast í einangrun í fangelsinu í litlum klefa. Lítill gluggi er á klefanum og er það eina útsýnið til umheimsins. Flestir fangarnir í fangelsinu fá sjónvarp í klefa sinn en þar eru þeir í 23 klukkustundir á dag allt árið. Þeir fá að fara út í eina klukkustund á dag ef það er ekki rigning. Þeir hafa nánast engin samskipti við annað fólk og borða alltaf í klefum sínum.