Bjarni Benediktsson fjármálaráðherra segir að seta hans í bankaráði AIIB bankans, sem sér um innviðafjárfestingu í mörgum löndum, sé fullkomlega eðlileg. Yfirlýsing hans kemur í kjölfar fyrirspurnar Björns Leví Gunnarssonar, þingmanns Pírata, til fjárlaganefndar, þar sem hann óskaði svara um þessi mál, meðal annars með vísan í siðareglur ráðherra. Björn spurði meðal annars hvort um væri að ræða launað starf og eins hvernig varaformennska í bankaráðinu færi saman við starf Bjarna sem ráðherra.

Orðrétt segir Bjarni í yfirlýsingu á Facebook: „Fjármála- og efnahagsráðherra Íslands situr (ólaunað) í bankaráði AIIB bankans með fulltrúum annarra 78 (fullgildra)aðildarríkja þessa innviðafjárfestingabanka. Í síðustu viku skipti bankaráðið með sér verkum. Það kom í hlut Íslands og þar með minn að gegna varaformennsku.‬
Það er með miklum ólíkindum að sjá vangaveltur um brot á siðareglum ráðherra af þessu tilefni. Það vantar bara að menn segist hafa um það rökstuddan grun“

Ísland var meðal 57 stofnenda AIIB bankans, ásamt öllum Norðurlöndunum, en eftir ársfundinn í liðinni viku eru meðlimir orðnir 100. Hlutafé bankans er 100 milljarðar bandaríkjadala. Ísland er í kjördæmi með Bretlandi, Danmörku, Noregi, Póllandi, Rúmeníu, Sviss, Svíþjóð og Ungverjalandi. Löndin deila saman stjórnarmanni í bankanum, sem nú er frá Bretlandi.