Starfaði sem sushi-kokkur í heimalandi sínu – Var ekki trúrækinn á árum áður
Sundurtætt lík hins tuttugu og tveggja ára gamla Akbarzhon Jalilov hefur fundist á vettvangi árásarinnar í St. Pétursborg. Yfirvöld í Kremlin staðfestu fundinn og að talið sé öruggt að Jalilov hafi sprengt sig í loft upp í lestinni sem var á fullri ferð milli tveggja lestarstöðva í borginni.
Þá er talið að Jalilov hafi komið fyrir annarri sprengju á bak við slökkvitæki í annarri lestarstöðinni en lögreglunni tókst að aftengja sprengjuna.
Rússnesk yfirvöld hafa sent frá sér myndir úr öryggismyndavélum þar sem hinn grunaði sérst ganga í gegnum lestarstöð. Á einni myndinni sést hann með kreppta hnefa en líkur eru taldar á að í höndunum hafi hann haft búnað til þess að virkja sprengjuna. Talið er að árásin tengist íslömskum öfgamönnum.
Í frétt Daily Mail um málið kemur fram að Jalilov hafi starfað sem sushi-kokkur í heimalandi sínu og segir fyrrum vinnufélagi að hann hafi ekki verið trúrækinn þegar þeir störfuðu saman árið 2013.
Um 500 einstaklingar frá Kyrgyzstan hafa gengið til liðs við hryðjuverkasamtökin ISIS það sem af er.