Níu börn á aldinum fimm mánaða til sjö ára hafa greinst með alvarlega sýkingu af völdum E.coli. Tvö þeirra voru lögð alvarlega veik með nýrnabilun inn á Barnaspítala Hringsins fyrir helgi. Smitið hefur verið rakið til Bláskógabyggðar í Árnessýslu en smit getur borist með smituðum matvælum eða vatni og með beinni snertingu við dýr eða úrgang dýra. Læknir greinir frá því að ekki sé útilokað að smitið leiði til varanlegs nýrnaskaða. Frá þessu greinir í Morgunblaðinu í dag.

„Það ver verið að leita viðar núna. Þegar við forum að leita meira þá förum við að finna meira en það er enginn sem er svona veikur eins og þessi börn, segir Þórólfur Guðnason sóttvarnalæknir í samtali við Morgunblaðið.

Hann segir það ekki ljóst hvort fleiri séu smitaðir en það sé þó til rannsóknar. Börn eru einstaklega viðkvæm fyrir bakteríunni og verða fremur veik heldur en fullorðnir. Annað barnið sem lagt var inn á sjúkrahús hefur verið útskrifað, hitt liggur enn inni.

Uppruni veirunnar er talinn vera í Bláskógabyggð í Árnessýslu, en börnin sem veikust urðu höfðu bæði verið þar. Önnur möguleg tilvik hafa sömuleiðis verið rakin þangað.

„Við vinnum eftir því að þetta sé ein uppspretta,“ segir Þórólfur.

E.coli getur, líkt og áður segir, smitast með menguðum matvælum eða vatni, með beinni snertingu við dýr eða úrgang dýra.

Viðar Örn Eðvarðsson, læknir,  segir að meðferð barnsins sem enn liggur inni gangi vel. „Þetta gengur samkvæmt áætlun eins og við má búast. Þetta er hættulegur sjúkdómur sem er verið að meðöndla og það gengur vel. Flestir ná sér vel en það er ekki útilokað að nýrnastarfsemin geti verið eitthvað skert þegar frá líður. Það er ómögulegt að segja á þessu stigi málsins og það verður bara að fá að koma í ljós. Við munum fylgja börnunum vel eftir“

Fréttin hefur verið uppfærð – Áður sagði að fjögur börn hefðu greinst með bakteríuna en hið rétta er að um helgina greindust fimm til viðbótar.