Héraðsdómur Reykjavíkur dæmdi í vikunni 25 ára karlmann í 60 daga óskilorðsbundið fangelsi fyrir þjófnað.

Maðurinn var ákærður fyrir að hafa, aðfaranótt miðvikudagsins 18. janúar síðastliðinn, í nágrenni við Dalaþing í Kópavogi, farið inn í ólæstar bifreiðar og stolið úr þeim tveimur sólgleraugum og GPS-staðsetningartæki. Maðurinn mætti ekki við þingfestingu málsins og var hann sakfelldur samkvæmt ákæru.

Hann hefur áður komist í kast við lögin vegna fíkniefna- og þjófnaðarbrots, en með broti sínu í janúar rauf hann skilorð dóms sem hann fékk í október í fyrra.