Lögreglan á Suðurnesjum hefur ekki setið auðum höndum síðustu daga. Ófáir lögðu land undir fót um páskana og mikill erill var í flugstöð Leifs Eiríkssonar. Lögreglan á Suðurnesjum þurfti að hafa nokkur afskipti af flugfarþegum vegna ölvunar. Til að mynda fengu þrír karlmenn ekki að fara til Búdapest vegna verulegrar ölvunar. Lögreglan handtók annan ölvaðan ferðalang sem komst ekki lengra en í flugstöðina en sá átti miða til Berlínar.

Tafir á flugi

Tveimur mönnum var auk þess vísað frá flugi til Orlando vegna drykkjuláta og framkomu við áhafnarmeðlimi. Lögregla telur að í einhverjum tilfellum hafi tafir á flugi vegna óveðurs átt sinn þátt í því að ölvun varð svo mikil og raun bar vitni.

Lögregla hafði áður stöðvað á annan tug ökumanna á sama stað í sama tilgangi. Þá hlaut einn ökumaður tiltal sökum ökuhraða.

Skemmdarvargar tóku ekki páskafrí á Suðurnesjum. Tvær bifreiðar sem lagt var inn í porti í Keflavík voru skemmdar og önnur þeirra mikið. Lögreglumenn sem sendir voru á vettvang fundu steinhnullunga í báðum þeirra sem talið er líklegt að hafi verið notaðir til að valda á þeim skemmdum.

Gripinn glóðvolgur í Bónus

Brotist var inn í listasmiðju á Ásbrú og var málningarfötum kastað af millilofti niður á gólf og tæmt úr slökkvitæki á gólf smiðjunnar.

Þá var karlmaður á þrítugsaldri gripinn glóðvolgur í Bónus í Keflavík við að stinga kjötlæri ofan í töskuna sína um liðna helgi. Að sögn lögreglu voru það óbreyttir borgarar og starfsmenn sem héldu manninum uns laganna verðir komu á svæðið. Maðurinn lét öllum illum látum og var hann því handtekinn og færður á lögreglustöð. Auk þess var piltur staðinn að verki í verslun í Sandgerði við þjófnað.