Dagfinnur Stefánsson, flugstjóri og einn stofnenda Loftleiða, lést síðastliðinn sunnudag. Hann var 93 ára. Frá þessu greinir Morgunblaðið. Óhætt er að segja að Dagfinnur hafi verið frumkvöðull í íslenskri flugsögu og er talið að hann hafi flogið vel yfir 30 þúsund flugtíma á ævi sinni. Hann starfaði sem flugstjóri hjá ýmsum félögum, svo sem Flugleiðum, Air Bahama og Cargolux.
Dagfinnur sinnti sjálfboðastarfi sem flugstjóri fyrir hjálparsamtök. Bæði fyrir samtökin Orbis, alþjóðleg hjálparsamtök á sviði augnlækninga, sem og flug með matvæli til Biafra. Hann er sagður hafa átt hugmyndina að því að nota DC3-vél til landgræðslu eftir að flugvélin hafði lokið hlutverki sínu sem farþegavél.
Dagfinnur hlaut íslensku fálkaorðu þann 17. júní 2014 fyrir brautryðjandastörf á vettvangi flug- og samgöngumála. Börn Dagfinns eru Inga Björk, Stefán og Leifur Björn, barnabörn eru fimm og barnabarnabörn þrjú.
Ómar Ragnarsson, skemmtikraftur með meiru, sagði í bloggfærslu fyrir sex árum að Dagfinnur væri ein hans helsta fyrirmynd, auk Magnúsar Norðdal Ekki síst vegna þess að Dagfinnur flug enn þó hann væri að nálgast nírætt. „Bestu listflugmenn heims eru ungir og fara í harðar líkamsrækt oft í viku, jafnvel daglega. Dagfinnur og Magnús eru stórkostlegar fyrirmyndir fyrir fólk á öllum aldri sem vill nýta líf sitt sem lengst og best,“ skrifaði Ómar.
