Telja framburð hans ótrúverðugan
Karlmaður sem grunaður er um að hafa nauðgað tveimur konum eftir árshátíð á hóteli á Suðurlandi var fyrir helgi dæmdur í áframhaldandi gæsluvarðhald til 8 maí næstkomandi. Maðurinn, sem er spænskur, hefur játað að hafa haft kynmök við konurnar en segir það hafa verið með samþykki þeirra. Þá kveðst hann hafa hætt um leið og hann varð þess áskynja að þær vildu þetta ekki.
RÚV greinir frá því að héraðssaksóknari telji framburð mannsins ótrúverðugan, ekki síst með hliðsjón af framburði kvennanna, viðbrögðum þeirra sem og framburði annarra vitna.
Áður hefur komið fram að konurnar segjast báðar hafa verið sofandi þegar maðurinn braut gegn þeim. Önnur var í svo miklu uppnámi eftir meinta nauðgun að hún þurfti róandi lyf.
Eftir að maðurinn var handtekinn á hótelinu fundust svartar kvenmannsnærbuxur í brjóstvasa hans.Yfirmaður mannsins sagðist í yfirheyrslu hjá lögreglu hafa beðið hann um að fara varlega í neyslu áfengis á árshátíðinni – maðurinn ætti það til „að tapa stjórn á hvötum sínum þegar hann er undir áhrifum.“
Í gæsluvarðhaldsúrskurðinum kemur fram að þann 8. maí næstkomandi séu liðnar 12 vikur frá því að maðurinn var fyrst úrskurðaður í gæsluvarðhald. Samkvæmt sakamálalögum má ekki haldi manni lengur en í þann tíma án þess að gefa út ákæru. Niðurstaða um það hvort maðurinn verður ákærður mun liggja fyrir áður en gæsluvarðhald yfir manninum rennur út.