Um hádegi í dag barst lögreglu tilkynning um fisþyrlu  sem hafði hlekkst á í lendingu skammt frá Þingvöllum. Voru tveir aðilar í þyrlunni en sakaði ekki. Rannsóknarnefnd flugslysa var kvödd á vettvang og annast rannsókn ásamt lögreglu.

Þetta kemur fram í dagbók lögreglunnar á Suðurlandi en þar kennir ýmissa grasa í dag. Björgunarsveitir sóttu fótbrotinn einstakling í Reykjadal upp af Hveragerði og komu honum til móts við sjúkraflutningamenn sem fluttu hann til aðhlynningar.

Mjög mikið hefur verið að gera hjá lögreglunni í dag vegna góðs veðurs og fjölmörgum útköllum þurft að sinna. Hér fyrir neðan er tengill á Facebook-síðu lögreglunnar. Í pistlinum segir meðal annars frá því að umferð um Suðurlandsveg í Ölfusi og inn á Selfoss sé nú mjög hæg og eru vegfarendur beðnir um að sýna tillitsemi við þessar aðstæður.