Einbýlishúsið Skúmsstaðir 2 á Eyrarbakka er til sölu og hægt er að festa kaup á húsinu á tíu milljónir króna. Húsið er tæplega 150 fermetrar og telst það því ekki hátt verð, nema þegar skyggnst er inn í húsið sem er í niðurníslu.
„Húsið hefur staðið opið og óupphitað er í niðurníslu og þarfnast gagngerra endurbóta að utan sem innan,“ stendur í fasteignaauglýsingunni, sem hefur verið deilt talsvert á samfélagsmiðlum.
Einn ónefndur Facebook-ari hefur þetta um húsið að segja:
„Nú hef ég gert upp nokkrar rottuholur í gegnum tíðina, en meira að segja ég fæ hermannaveiki við að skoða myndirnar af þessari. Ég veit það samt að mig mun langa í þetta eftir tvo kaffibolla.“
Húsið var byggt árið 1937 og er búið fimm svefnherbergjum. Fullkomið fyrir laghenta eða glórulaus kaup – það er svo smekksatriði.