Guðmundar Spartakus Ómarssonar fer fram á ómerkingu á fjölda ummæla og vill skaðabætur vegna umfjallanna sem Atli Már Gylfason blaðamaður birti í Stundinni. Áður hefur verið greint frá því að Guðmundur Spartakus hafi stefnt Sigmundi Erni Rúnarssyni dagskrárstjóra Hringbrautar og RÚV fyrir meiðyrði. Lögmaður Guðmundar er Vilhjálmur H. Vilhjálmsson.
Sjá einnig: Sigmundi Erni og RÚV stefnt fyrir meiðyrði
Hjá RÚV eru það Rakel Þorbergsdóttir, fréttastjóri, Pálmi Jónasson, Jóhann Hlíðar Harðarson og Hjálmar Friðriksson sem er stefnt. Þar er farið fram á ómerkingu á 28 ummælum og vill Spartakus 10 milljónir í bætur. Á Hringbraut eru ummælin 9. Samkvæmt heimildum DV eru ummælin sem Spartakus fer fram á að verði dæmt dauð og ómerk svipuð á tölu og hjá RÚV.
Ríkisútvarpið birti frétt í byrjun síðasta árs þar sem haft var eftir ABC-Color að Guðmundur Spartakus væri valdamikill dópsmyglari í Suður-Ameríku. Þar kom einnig fram að ekkert hefði spurst til Guðmundar í tvö ár. DV ræddi við föður Guðmundar sem sagði að Guðmundur hefði aldrei verið týndur.
Nafn Guðmundar Spartakus hefur oft komið upp í tengslum við fréttaflutning af hvarfi Friðriks Kristjánssonar sem ekkert hefur spurst til síðan í apríl 2013. Í umfjöllun Stundarinnar var sagt að lögregluyfirvöld hér á landi hefðu leitað að Guðmundi Spartakusi í rúm þrjú og hálft ár vegna hvarfsins í von um að hann gæti gefið upplýsingar sem kæmu að gagni.
Guðmundur birtist hér í vetur en er samkvæmt heimildum DV farinn aftur af landi brott. Stundin vitnaði einnig í ABC-Color sem fullyrti í grein að Guðmundur væri hægri hönd Sverris Þórs sem situr í fangelsi í Brasilíu fyrir eiturlyfjasmygl. Var einnig sagt í sömu frétt og vitnaði í ABC-Color að Guðmundur væri umfangsmikill í eiturlyfjaviðskiptum.
Í Stundinni sagði einnig að lögregla hefði loks seint á síðasta ári náð tali af Guðmundi Spartakusi og hefði hann verið handtekinn og færður til yfirheyrslu vegna hvarfs Friðriks.
Fréttir Stundarinnar sem blaðamaðurinn Atli Már Gylfason skrifaði vöktu mikla athygli. Í samtali við DV furðar Atli Már sig á að Guðmundur hjóli í fjölmiðla:
„Mér þykir það bæði ótrúlegt og athyglisvert eða í rauninni ótrúlega athyglisvert að maður sem lögreglan telur búa yfir upplýsingum um hvarf Friðriks Kristjánssonar í Suður-Ameríku árið 2013 skuli eyða kröftum sínum í að lögsækja íslenska blaðamenn í stað þess að aðstoða við að upplýsa um málið,“ segir Atli Már.
„Ég er bara orðlaus.“
