Skömmu fyrir klukkan 19 í gær var ökumaður handtekinn í miðborginni en hann er grunaður um að hafa verið undir áhrifum fíkniefna, ítrekaðan akstur sviptur ökuréttindum, brot á lyfjalögum, vörslu fíkniefna, þjófnað á skráningarnúmerum en umrædd skráningarnúmer voru á bifreiðinni sem var auk þess ótryggð.
Á tíunda tímanum var annar ökumaður handtekinn grunaður um að vera undir áhrifum fíkniefna. Hann gaf upp rangt nafn og kennitölu þegar lögreglan hafði afskipti af honum. Hann reyndist vera sviptur ökuréttindum og er grunaður um vörslu fíkniefna.
Sex ökumenn til viðbótar voru handteknir í gærkvöldi og nótt grunaðir um akstur undir áhrifum fíkniefna.
Á sjöunda tímanum í gær var bifreið ekið á kantstein á Helgafellsvegi í Mosfellsbæ og síðan á ljósastaur. Ökumaður var fluttur á sjúkrahús með sjúkrabifreið en hann fann til eymsla í baki og víðar. Kranabifreið flutti bifreiðina af vettvangi.