Mistökin áttu sér stað um miðjan októbermánuð árið 1997 í Fossvogskapellu. Uppgötvuðust þau í kistulagningu, það er að rangt lík var í kistunni. DV greindi frá málinu þann 20. október en Ísleifur Jónsson útfararstjóri vildi ekki ræða þetta tiltekna mál. DV hafði heimildir fyrir því að líklegasta skýringin væri sú að kistur hinna látnu hafi verið merktar sömu upphafsstöfum. Nöfnin voru hins vegar ekki þau sömu.
Ekki rukkað
Ísleifur sagði hins vegar að jafn alvarleg mistök sem þessi væru mjög sjaldgæf og gerðust aðeins á margra ára fresti. Einnig sagði hann að hafa bæri í huga að Útfararstofa kirkjugarðanna sæi um allt að eitt þúsund athafnir á ári hverju og heilmikið ferli lægi að baki hverri athöfn.
En hver voru viðbrögðin í svona tilfellum? Ísleifur sagði að hið fyrsta væri að halda fund með öllum þeim sem tengdust útförinni. Þar væri komist til botns í því hvernig mistökin hefðu gerst og unnið að því að koma í veg fyrir að þau endurtækju sig.
Einnig væri fundað með aðstandendum hins látna og allar rukkanir felldar niður. Fara væri varlega því að málið væri að sjálfsögðu viðkvæmt.
