Það var stór dagur í Eurovision-heimi í gær. Margir höfðu beðið í ofvæni eftir að Rússinn Sergey Lazarev frumflytti lagið sitt, en þangað til í gær hafði hann trónað á toppi listans á Eurovision World, sem tekur saman sigurlíkur laganna í Eurovision úr ýmsum veðbönkum.
Sergey frumflutti lagið í gær. Það heitir Scream og er best lýst sem afar dramatískri kraftballöðu. Skiptar skoðanir eru um lagið. Mörgum finnst það dásamlegt á meðan öðrum finnst það vonbrigði. Talsvert lakara en lagið sem skilaði honum þriðja sæti fyrir þremur árum í Stokkhólmi, You’ Are The Only One. Velta einhverjir því fyrir sér hvort Sergey muni feta í fótspor samlanda síns, Dima Bilan, sem lenti í öðru sæti árið 2006 með smellinn Never Let You Go en fór með sigur af hólmi árið 2008 með talsvert lakara framlag, Believe.
Það virðist þó vera einróma álit að lagið sé ekki eins sterkt og væntingar stóðu til og hrundi lagið niður í veðbönkum. Þegar þetta er skrifað situr það í öðru sæti listans á Eurovision World og er á niðurleið.
Hinn hollenski Duncan Laurence með lagið Arcade hefur stolið toppsætinu af Rússanum, en aðdáendur keppninnar eru himinlifandi með framlag Hollands í ár. 18 prósent líkur er að Eurovision 2020 verði haldið í Hollandi.
Sænska Söngvakeppnin, Melodifestivalen, eða Mello eins og harðir Eurovision-aðdéndur kalla keppnina, fór fram í gærkvöldi. Mikið var um dýrðir eins og venja er í sænsku keppninni og spennan gríðarleg. Að lokum bar John Lundvik sigur úr býtum með lagið Too Late For Love. Eftir að Svíar völdu sér fulltrúa eru þeir í þriðja sæti á fyrrnefndum lista Eurovision World, eins og þeir voru fyrir kvöldið í gær.
Gaman er að segja frá því að John þessi Lundvik er höfundur framlags Breta í ár, lagsins Bigger Than Us sem flutt er af Michael Rice. Finnst einhverjum þessi tvö lög ansi lík.
Hástökkvari gærdagsins er hins vegar Svisslendingurinn Luca Hänni sem fór úr sjötta sæti í það fjórða. Ísland situr enn sem fastast í sjöunda sæti.
