Dauðarefsing hefur verið í gildi á Sri Lanka áratugum saman en henni hefur ekki verið beitt síðan 1976. 2014 sagði böðull landsins starfi sínu lausu án þess að hafa nokkru sinni hengt mann. Hann sagðist verða veikur í hvert sinn sem hann sæi gálga og gæti því ekki gegnt starfinu. Annar var ráðinn til starfa en mætti aldrei til vinnu.

En nú gæti orðið breyting á því nýlega var auglýst eftir tveimur böðlum. Forseti landsins, Maithripala Sirisena vill nefnilega endurvekja dauðarefsingar á næstu vikum og því þarf böðla til starfa. Dauðarefsing liggur aðeins við fíkniefnasmygli.

Á mánudaginn var auglýst eftir tveimur „andlega sterkum“ karlmönnum á aldrinum 18 til 45 ára „með frábært siðferði“ til að gegna störfum böðla.

Fíkniefnasmygl og fíkniefnaneysla er vaxandi vandamál á Sri Lanka og það knýr forsetann til að kalla á endurupptöku dauðarefsinga. Hann hefur að sögn horft til Filippseyja í þessu sambandi en þar er gengið mjög harkalega fram gegn þeim sem eru á einhvern hátt viðriðnir fíkniefni.