Ekki er langt síðan Donald Trump, Bandaríkjaforseti, lýsti því yfir að sigur hefði unnist á hryðjuverkasamtökunum sem kenna sig við Íslamska ríkið. En Jürgen Stock, forstjóri alþjóðalögreglunnar Interpol er ekki sammála Trump í þessu máli.

„Hættan er enn mikil og staðan er flókin. Hættan er enn alþjóðlegri en nokkru sinni.“

Sagði hann í samtali við NBC News.

Trump lýsti yfir sigri í baráttunni við Íslamska ríkið fyrir jól og tilkynnti um leið að hersveitir Bandaríkjanna verði kallaðar heim frá Sýrlandi. Þetta hefur farið illa í marga bandamenn Bandaríkjanna sem hafa áhyggjur af að nú muni hryðjuverkasamtökin hafa frjálsar hendur og geti byggt sig upp á nýjan leik.

Stock er sama sinnis og segist hafa áhyggjur af vígamönnum samtakanna sem hafa snúið aftur heim. Margir þeirra séu bardagareyndir og kunni að búa til sprengjur sem sé hægt að nota til hryðjuverkaárása. Þá hefur hann einnig áhyggjur af öllum liðsmönnum Íslamska ríkisins sem eru í haldi í Sýrlandi og segir að það þurfi að fara vel ofan í saumana á máli hvers og eins áður en þeim er sleppt.

Hann bendir á að erlendir hryðjuverkamenn, frá meira en 100 löndum, hafi tekið þátt í stríðinu í Sýrlandi og Írak og því sé Íslamska ríkið með stórt og mikið tengslanet.