Grímur Atlason eiginmaður Helgu Völu Helgadóttur þingmanns Samfylkingarinnar sendir Davíð Oddssyni kaldar kveðjur á Facebook. Þar sakar hann Davíð, Sigmund Davíð Gunnlaugsson og Miðflokkinn um árásir.

Í síðustu viku greindi DV frá því að þrálátur orðrómur gengi manna á milli um að Helgu Völu. Orðrómurinn sagði hana leggja stund á búðahnupl og jafnframt á hún að hafa verið staðin að verki í Hagkaup á dögunum. Helga Vala tók fram að um sögusagnir væri að ræða og nokkrar útgáfur til. Kvaðst hún heyra orðróminn úr öllum áttum. Hagar sendu síðan frá sér yfirlýsingu þar sem fram kom að Helga Vala væri alsaklaus og hefði aldrei verið kærð fyrir að stela úr verslunum fyrirtækisins.

Orðrómurinn var hávær og sagan var að hún væri stelsjúk. Var Helgu Völu líkt við Winona Ryder og fleiri til sem hafa gerst sekir um búðarhnupl.

Helga Vala sagði að hún vissi ekki hver hefði komið gróusögunni af stað en grunaði hana þó að tímasetningin væri engin tilviljun, en á þessum tíma var haldinn fundur stjórnskipunar- og eftirlitsnefndar Alþingis þar sem þingmenn Miðflokksins, Gunnar Bragi Sveinsson og Sigmundur Davíð Gunnlaugsson, sökuðu Helgu Völu um pólitískt útspil.

Í dag birtist svo frétt í Morgunblaðinu þar sem rætt var við Karl Gauta Hjaltason fyrrverandi þingmann Miðflokksins. Hann er einn þeirra sem sátu að sumbli á Klaustur bar í nóvember í fyrra. Þar ræddi hann um tölvupóst sem Helga Vala sendi eftir að hún ásamt tveimur þingmönnum vék af fundi í umhverfis- og samgöngunefnd Alþingis. Fundinum var ekki lokið þegar Helga Vala sendi á annan þingmann:

„Hér er lokkandi sól í garðinum og bjór í krana.“

Af orðum Karls Gauta í Morgunblaðinu í dag má ætla að ekki sé óeðlilegt eða óalgengt að þingmenn fari saman á veitingahús og fái sér bjór. „Það er ekkert nýtt,“ segir hann. Aðspurður hvort gagnrýnin á fundinn á Klaustur bar í nóvember, þar sem sex þingmenn létu ýmis ósæmileg ummæli falla, hafi ekki snúist að því sem var sagt þar, segir Karl Gauti:

„Það hafa sumir verið að finna að því að men hafi verið þarna á vinnutíma.“

Grímur Atlason finnst með þessu vegið á ósanngjarnan hátt að konu sinni. Hann segir:

„Samkvæmt Davíð Oddssyni, Sigmundi Davíð, Miðflokknum og málgagni þeirra Morgunblaðinu hef ég búið með drykkjukonu og þjófi í 20 ár. Við því er þetta að segja: Aum var þeirra sókn en hún var þó hátíð miðað við vörnina. Ég hef sagt það áður og geri það aftur: Éttann sjálfur ómennið yðar!“