Einkaþjálfarinn Jillian Michaels, sem er hvað þekktust fyrir að vera þjálfari í raunveruleikaþættinum Biggest Loser um árabil, skefur ekkert af því þegar hún er spurð út í ketó-mataræðið svokallaða í nýju myndbandi á vef Women‘s Health.
„Ég skil þetta ekki. Af hverju ætti einhverjum að finnast þetta vera góð hugmynd?“ spyr Jillian, sem svarar í myndbandinu spurningum frá lesendum um hitt og þetta, þar á meðal um ketó-mataræðið sem felst í því að halda kolvetnum í lágmarki.
„Nei, vont plan. Út af milljón ástæðum,“ segir hún og bætir við að líkaminn þurfi á kolvetnum, fitu og próteini að halda. Ef eitt af þessum efnum dettur út þá sé fólk að svelta sig sem hafi slæm áhrif á heilsu og vellíðan.
„Til að gera langa sögu mjög stutta: Forðist ketó-mataræðið. Þetta er almenn skynsemi. Mataræði í góðu jafnvægi er lykillinn.“
Jillian segist sjálf borða mikið af kolvetnum en mælir með því að velja kolvetnin rétt.
„Ef þig langar í pasta þá skaltu fá þér heilkorna pasta, fá þér lífrænt ef það er hægt og bæta þessu inn í mataræði sem er í jafnvægi.“