Margir hafa þann slæma ávana að láta braka í fingrum. Oft er talað um að þetta geti valdið gigt en svo mun ekki vera og því getur fólk glaðst yfir því en það er ekki þar með sagt að þetta sé með öllu hættulaust, langt frá því. Því fékk rúmlega þrítugur bandarískur karlmaður að kynnast nýlega. Hann var iðinn við að láta braka í fingrum og það varð honum næstum að bana.

Antoine Boylston var að láta braka í fingrunum dag einn þegar hann fann skyndilega fyrir miklum sársauka í litlafingri. Hann hélt að hann hefði brotið fingurinn en fljótlega kom í ljós að svo vel hafði hann ekki sloppið. Höndin varð svört og bólgin þegar leið á daginn og hann fór því á sjúkrahús. Læknar komust fljótt að því að hann var með „necrotizing fasciitis“ sem er holdétandi bakteríusýking eftir því sem segir í Metro.

„Ég hélt að holdétandi bakteríur væru eitthvað sem væri bara eitthvað sem fólk fengi í kvikmyndum en ekki við að láta braka í fingrum. Ég gerði það oft og hugsaði aldrei út í að ég myndi sjá eftir því.“

Læknar sögðu honum að hann hefði verið með sár á litlafingrinum sem hafi rifnað upp þegar hann lét braka í fingrunum. Þar með var leiðin greið fyrir þessi illvígu bakteríu til að ráðast á vefina í hönd hans og einnig í handleggnum og innri líffæri.

Læknar neyddust til að skera allan handlegginn upp og fjarlægja sýktan vef. Síðan var húð af öðru læri hans grædd á handlegginn og hluta handarinnar.

Boylston lá á gjörgæslu í eina viku en læknar óttuðust um hríð að hann myndi ekki lifa þetta af en í besta falli töldu þeir að hann myndi missa handlegg. En sem betur fer fór þetta þó ekki svo illa en Boylston missti litlafingurinn og töluverðan mátt í hægri handlegg.

„Það er víst þannig að styrkurinn í höndinni kemur frá litlafingri og baugfingri. Hann lítur ekki út fyrir að vera mikilvægur en litlifingurinn er einn versti fingurinn til að missa. En ég er á lífi og ég ætla aldrei aftur að láta braka í þeim, það get ég heldur ekki.“