Hljómsveitin Á móti sól hefur verið lengi að. Ef allt er talið er sveitin orðin 22 ára, en starfsárin í núverandi mynd, frá því að Magni Ásgeirsson tók við míkrafóninum í lok síðustu aldar, eru orðin 19 og það sér engan veginn fyrir endann á vinskapnum og spilagleðinni.
Eftir sveitina liggja átta hljómplötur, sumar hafa selst í gull og platínu, aðrar miklu, miklu minna.
Hljómsveitin hefur gert bunka af vinsælum lögum. Fyrstu starfsárin komu smellirnir á færibandi, fyrst dillandi stuðlög á borð við Djöfull er ég flottur, Spenntur, Keyrðu mig heim og Æ mig langar upp á þig og síðar rómantík eins og Hvar sem ég fer, Vertu hjá mér, Ég er til og Allt, svo aðeins nokkur dæmi séu tiltekin.
Síðasta lagið sem Á Móti Sól sendi frá sér kom út sumarið 2016. Það var stórsmellurinn Ég verð að komast aftur heim, sem var eitt mest spilaða lagið það árið.
Á Móti Sól verður í tónleika- og sögugírnum í Alþýðuhúsinu þann 17. nóvember. Hljómsveitin mun leika öll sín vinsælustu lög og segja sögurnar á bak við þau – og einhverjar allt aðrar sögur líka. Til dæmis kemur örugglega eitthvað af góðum sögum af Þjóðhátíð þegar líður á kvöldið.
Húsið opnar kl. 20.30 og hljómsveitin fer á svið kl. 21.00. Strákarnir lofa frábærri stemningu.
Forsala aðgöngumiða á midi.is.
