Hljóðupptaka hefur komið fram sem bendir til þess að Mohammad bin Salman, krónprins Sádí-Arabíu, hafi fyrirskipað morðið á blaðamanninum Jamal Khashoggi í síðasta mánuði. Khashoggi hvarf eftir að hafa farið inn í húsakynni ræðismanns Sádí-Arabíu í Tyrklandi. Ýmist er talið að hann hafi verið pyntaður og aflimaður til dauða eða að lík hans hafi verið sundurlimað eftir morðið.
New York Times greinir frá þessu. Í fréttinni kemur fram að forstjóri bandarísku leyniþjónustunnar, C.I.A., Gina Haspel, hafi hlýtt á hljóðupptökuna í síðasta mánuði. Hljóðupptakan er af símtali þar sem einn af ódæðismönnunum, Maher Abdulaziz Mutreb, segir við viðmælanda sinn: „Segðu yfirmanninum þínum frá“ – Tell your boss. Tyrkneska leyniþjónustan komst yfir upptökuna og deildi henni með bandarísku leyniþjónustunni.
Upptakan er talin vera besta sönnunargagnið hingað til sem bendlar krónprinsinn við morðið. Ekki kemur þó fram með óyggjandi hætti að hinn umræddi „yfirmaður“ í upptökunni sé Mohammad bin Salman. Tyrkneskir leyniþjónustumenn hafa skýrt Bandaríkjamönnum frá því að þeir telji að Mutreb hafi hringt í einn af aðstoðarmönnum krónprinsins.
