Þrír karlmenn hafa verið dæmdir til sektrargreiðslu á bilinu 50 til 75 þúsund krónur vegna brota á lögum um náttúruvernd og brot á reglum um friðlandið á Hornströndum. RÚV greinir frá en dómur féll í héraðsdómi Vestfjarða á dögunum. Mennirnir dvöldu í leyfisleysi vikulangt í friðlandinu í Hornvík á Hornströndum og stunduðu þar ólöglegar veiðar. Þá var einn af þremenningunum sömuleiðis dæmdur fyrir að hafa meðferðis skotvopn án viðbótarleyfis frá sýslumanni.

Málið komst fyrst í fréttir í júní 2016 eftir að starfsmenn ferðaþjónustufyrirtækisins Borea Adventures kom að mönnunum þremur í neyðarskýli Björgunarfélags Ísafjarðar í Höfn í Hornvík sem er í friðlandi Hornstranda.

Hér má sjá frétt DV um málið

Ljósmynd/Rúnar Karlsson

Frá 15. apríl til 15. júní er fólki skylt að tilkynna um ferðir sínar á svæðinu þar sem þessi árstími er viðkvæmur fyrir dýraríkið. Það höfðu þremenningarnir ekki gert og voru því á staðnum í leyfisleysi en þeir höfðu jafnframt vopn og veiðibúnað meðferðis og höfðu stundað ólöglegar veiðar á svæðinu.

Starfsmennirnir greindu frá aðkomunni í færslu á facebook og voru lýsingarnar allt annað en fallegar. Þá var einnig greint frá málinu á facebook síðu Björgunarfélags Ísafjarðar.

„Dauðir mávar með skotsár, selshræ í fjöru, svartfuglsegg, opinn eldur með rusli, grillað á grónu landi svo eitthvað sé tínt til. Nánast allt sem fyrir augu bar var ólöglegt,“ skrifaði Rúnar Karlsson annar starfsmannanna í færslu sinni. Þá sagði hann í samtali við DV á sínum tíma: „Þetta var morðferð. Það átti að drepa allt.“

Mennirnir þrír neituðu sök fyrir dómi og sögðust ekki vita að þeir þyrftu að tilkynna um ferðir sínar. Þá sögðust þeir hafa verið með skotvopn meðferðis í öryggisskyni þar þar sem hvítabirnir kæmu á land á þessum slóðum.