Tvítugur maður, Anton Örn Guðnason, var úrskurðaður af Landsrétti í áframhaldandi gæsluvarðhald eftir hann áfrýjaði dómi Héraðsdóms Reykjavíkur. Sá dómur var kveðinn upp í lok janúar en þar var honum gert að sæta fimm og hálfs árs fangelsi fyrir manndrápstilraun fyrir að stinga mann í kviðinn að kvöldi 3. október á síðasta ári. Réðst hann inn á heimili fórnarlambsins í slagtogi við tvo aðra menn og voru þeir vopnaðir hnífum og mace-brúsum.

Annar mannanna var dæmdur í Héraðsdómi til að sæta 22 mánaða fangelsisvist fyrir líkamsárás fyrir að berja fórnarlambið með gítar. Þriðji maðurinn hlaut styttri dóm í ljósi þess að hann hafði sig minnst frammi. Mennirnir sögðust hafa verið staddir á heimili fórnarlambsins í þeim erindagjörðum að rukka inn 2 milljón króna skuld, en gáfu þeir honum að sök að hafa stolið fíkniefnum af Antoni Erni.

Fjórði aðili var svo sýknaður fyrir þátt sinn að málinu en honum var gefið að sök að hafa aðstoðað hina þrjá að komast inn á heimili fórnarlambsins en ekki þótti sannað að hann hafi átt frekari aðild að líkamsárásinni sjálfri. Landsréttur komst að þeirri niðurstöðu þegar litið væri til alvarleika brotsins væri það í þágu almannahagsmuna að tryggja áfram að kærði gangi ekki laus á meðan mál hans er til meðferðar hjá dómstólum.