Þann 17. ágúst árið 2017 bað innkauparáð Reykjavíkurborgar borgarlögmann um að gera álitsgerð um hvort samningar um framkvæmdina við Nauthólsveg 100 hafi verið gerðir í samræmi við þágildandi regluverk um opinber innkaup. Þann 21 ágúst óskaði borgarlögmaður svo formlega eftir gögnum frá SEA, skrifstofu eigna og atvinnuþróunar, vegna framkvæmda á bragganum. SEA afhenti borgarlögmanni möppu með gögnum en þau gögn reyndust ekki uppfylla umrædda beiðni borgarlögmanns. Ólafur I. Halldórsson starfsmaður SEA og Margrét Leifsdóttir arkitekt hjá Arkibúllunni, voru verkefnastjórar verkefnisins.
Borgarlögmaður sendi ítrekað tölvupósta þar sem beiðni um að SEA afhenti gögn vegna braggamálsins en beiðni embættisins var annað hvort aldrei svarað eða sagt að gögnin væru á leiðinni.
25. september 2017 – Ítrekun send
1. nóvember 2017 – Ítrekun send
1. desember 2017 – Borgarlögmaður fundar með verkefnastjóra SEA, engin gögn afhent
5. desember 2017 – Ítrekun send
13. desember 2017 – Ítrekun send
14. desember 2017 – Borgarlögmaður fundar með verkefnastjóra SEA, engin gögn afhent
28. janúar 2018 – Borgarlögmaður fundar með verkefnastjóra SEA, engin gögn afhent
7. febrúar 2018 – Borgarlögmaður fundar með verkefnisstjórum SEA, engin gögn afhent
21. febrúar 2018 – SEA sendir drög að minnisblaði sem inniheldur ekki umbeðnar upplýsingar
21. febrúar 2018 – Borgarlögmaður óskar eftir því að uppfærð drög myndu berast 1. mars 2018. Engin gögn bárust þann dag frá SEA.
7. mars 2018 – Ítrekun send
24. maí 2018 – Ítrekun send. Sama dag svarar verkefnisstjóri hjá SEA að leggja þyrfti lokahönd á minnisblað sem yrði klárað eftir helgi og að síðan yrði samantekt unnin úr upplýsingum SEA um kostnað. Hvorugt barst eftir helgina.
14. ágúst 2018 – Ítrekun send. Þeirri ítrekun svaraði verkefnisstjóri hjá SEA þann 16. ágúst 2018 og kvaðst ætla að koma með gögn í næstu viku. Gögnin skiluðu sér ekki vikuna eftir.
3. september 2018 – Verkefnisstjóri SEA sendi borgarlögmanni tölvupóst þar sem hann tilkynnti að gögnin yrðu tilbúin og voru þau send 7. september 2018 til borgarlögmanns.
Samkvæmt fyrirspurn DV um hvort einhverjar reglur gilda um svartíma sviða innan Reykjavíkurborgar til borgarlögmanns segir Ebba Schram, borgarlögmaður að reglur um svartíma til embættis borgarlögmanns séu ekki skrásettar heldur er miðað við að málshraði sé í samræmi við umfang máls hverju sinni.
