Líkt og DV greindi frá fyrr í dag er maðurinn sem hefur verið úrskurðaður í gæsluvarðhald vegna andláts ungrar konur á Akureyri meðal annars grunaður um að hafa ekki komið henni til aðstoðar.

Lögreglan hefur unnið að rannsókn málsins frá því um helgina. Lögreglan naut aðstoðar tæknideildar lögreglunnar á höfuðborgarsvæðinu við vettvangsrannsókn og er henni lokið. Karlmaður situr enn í gæsluvarðhaldi vegna rannsóknar þessa máls og var tekin skýrsla af honum í gær. Frekari skýrslutökur eru fyrirhugaðar.

Við handtöku mannsins fundust munir sem hann hafði í vörslum sínum en tilheyrðu hinni látnu. Í dag fór fram húsleit á dvalarstað mannsins með hans samþykki. Þar var lagt hald á síma og tölvubúnað sem tekinn verður til rannsóknar. Maðurinn og konan þekktust og höfðu verið í samskiptum kvöldið áður. Réttarkrufning hefur farið fram á hinni látnu og niðurstöðu hennar er beðið.
Lögregla mun ekki veita frekari upplýsingar að svo stöddu.