Breska danstónlistarsveitin Underworld kemur fram á tónlistarhátíðinni Sónar Reykjavík í mars. Þetta kemur fram í tilkynningu frá aðstandendum hátíðarinnar sem var send til fjölmiðla í morgun, en hátíðin fer fram 16. og 17 mars á fjörum sviðum í Hörpu.

Underworld er með stærstu danstónlistarsveitum heims, hefur gefið út fjölda platna á rúmlega 30 ára ferlinum og sent frá sér fjölda þekktra danssmella á borð við Born Slippy, Cowgirl, Jumbo, I exhale, Two Months off og Push Upstairs. Sveitin er þó ekki síst þekkt fyrir mikið sjónarspil á tónleikum, en hún hefur einu sinni áður spilað á Íslandi. Það var fyrir árið 1994 þegar sveitin kom fram í Laugardalshöll ásamt Björk, sem hafði nýlega gefið út fyrstu sólóbreiðskífu sína.

Meðal þeirra tónlistarmanna sem áður hefur verið tilkynnt að komi fram á Sónar Reykjavík 2018 eru Danny Brown (BNA), TOKiMONSTA (BNA), Lindström (Nor), Nadia Rose (Bre), Ben Frost (Ást/Ísl), Lena Willikens (Þýs), Jlin (BNA), Denis Sulta (Bre), Cassy b2b Yamaho (Bre/Ísl), Kode9 x Köji Morimoto (Bre/Jap), Bad Gyal (Spá), Lorenzo Senni (Íta), Lafawndah (Fra), Moor Mother (BNA), Bjarki, Högni, Hildur Guðnadóttir, Vök, Jói Pé x Króli, Joey Christ, Eva808, Blissful, Flóni og Reyjavíkurdætur.