Nýr formaður Sambands íslenskra sveitarfélaga er Aldís Hafsteinsdóttir, bæjarstjóri í Hveragerði. Sigraði Aldís með 91 atkvæði eða 62,76% atkvæða. Er Aldís fyrsta konan sem er kjörin formaður sambandsins, samkvæmt tilkynningu.
Tveir voru í framboði til formanns og hlaut mótframbjóðandi Aldísar, Gunnar Einarssson, bæjarstjóri í Garðabæ, 49 atkvæði. Atkvæði greiddu 145. Auðir og ógildir atkvæðaseðlar voru 5.
Formannskosningu laun nú kl. 11 í Hofi, Akureyri, þar sem XXXII. landsþing Sambands íslenskra sveitarfélaga hefur staðið yfir frá því á miðvikudag. Halldór Halldórsson, formaður sambandsins til síðustu 12 ára, tilkynnti fyrr á þessu ári að hann gæfi ekki kost á sér til endurkjörs og varð þá ljóst að það kæmi í hlut landsþingsins nú að kjósa nýjan formann.
Aldís varð bæjarstjóri í Hveragerði árið 2006 og var hún jafnframt fyrsta konan til að gegna því embætti. Áður hafði hún leitt lista Sjálfstæðisflokksins í tvennum sveitarstjórnarkosningum eða frá árinu 1998. Þá hefur hún gegnt fjölmörgum trúnaðarstörfum á vegum sambandsins.
Þá fór einnig fram í morgun stjórnarkjör í stjórn og varastjórn sambandsins.
Eftirtalið sveitarstjórnarfólk var kosið í stjórn:
Reykjavíkurborg: Heiða Björg Hilmisdóttir (S), Þórdís Lóa Þórhallsdóttir (C), Eyþór Arnalds (D); Suðvesturkjördæmi: Gunnar Einarsson, Garðabær (D), Guðmundur Ari Sigurjónsson, Seltjarnarnesbær (S); Norðvesturkjördæmi: Rakel Óskarsdóttir, Akraneskaupstaður (D), Bjarni Jónsson, Svf. Skagafjörður (V); Norðausturkjördæmi: Kristján Þór Magnússon, Norðurþing (D), Jón Björn Hákonarson, Fjarðabyggð (B); Suðurkjördæmi: Aldís Hafsteinsdóttir, Hveragerðisbær (D), Ásgerður K. Gylfadóttir, svf. Hornafjörður (B).
Þá voru eftirtalin kjörin í varastjórn:
Reykjavíkurborg: Skúli Þór Helgason (S), Dóra Björt Guðjónsdóttir (P), Hildur Björnsdóttir (D), Suðvesturkjördæmi: Haraldur Sverrisson, Mosfellsbær (D), Adda María Jóhannsdóttir, Hafnarfjarðarkaupstaður (S); Norðvesturkjördæmi: Daníel Jakobsson, Ísafjarðarbær (D), Halldóra Lóa Þorvaldsdóttir, Borgarbyggð (V); Norðausturkjördæmi: Gauti Jóhannesson, Djúpavogshreppur (D), Guðmundur B. Guðmundsson, Akureyrarkaupstaður (D); Suðurkjördæmi: Margrét Ólöf A. Sanders, Reykjanesbær (D), Lilja Einarsdóttir, Rangárþing eystra (B).
Formanns- og stjórnarkjör er til fjögurra ára í senn.
