Fjölmargir aðilar tengdir sjávarútvegi í Panamaskjölunum
„Ég hef aldrei heyrt þetta nafn áður. Ég skil ekki hvernig ég á að tengjast þessu. Ég veit ekki hvernig stendur á þessu,“ segir Jakob Valgeir Flosason, eigandi einnar af kvótahæstu útgerðum landsins en nafns hans er að finna í Panamaskjölunum svokölluðu, ásamt nöfnum fjölmargra annarra Íslendinga sem tengjast sjávarútvegi og fisksölu. Þetta kemur fram á vef Reykjavík Media í kvöld.
„Ég átti ekki neitt slíkt; ég skil ekki hvað þú ert að tala um,“ segir Jakob Valgeir jafnframt aðspurður um málið en fram kemur að útgerðarfyrirtæki hans, Jakob Valgeir í Bolungarvík skilaði 850 milljón króna hagnaði í fyrra. Er nafn hans tengt við aflandsfélagið Aragon Partners Inc. í Panama
Annar aðili í sjávarútvegi sem kemur við sögu í gögnunum er Guðmundur Steinar Jónsson, einn af Sjólaskipssystkinunum svokölluðu, sem tengdur er við aflandsfélagið fChampo Consulting Ltd. á Tortólu.
Auk Guðmundar má finna þrjú önnur af systkinunum úr Sjólaskipum í Panamagögnunum.
„Ég hef ekkert um þetta að segja. Þetta er bara mitt mál,“ segir Guðmundur Steinar aðspurður um málið.
Fram kemur á vef Reykjavík Media að mörg gagnanna séu frá tímabilinu 2010 til 2014 sem þýðir að notkun sumra félaganna á aflandsfélögum í skjattaskjólum stöðvaðist ekki við efnahagshrunið.
Dæmi um það eru nýjustu gögnin um aflandsfélagið Freezing Point Corp, sem í eigu Sigurðar Gísla Björnssonar, framkvæmdastjóra fiskútflutningsfyrirtækisins Sæmark. Þau gögn eru einungis tveggja ára gömul en félagið var stofnað í Panama árið 2009.
Fram kemur að félagið hafi á árunum 2010 og 2001 gefið út reikninga upp á tæplega 40 milljónir íslenskra króna sem stílaðir voru á fyrirtæki á Kýpur. Ekki er tekið fram í hverju þjónusta umrædds Panamafélags felst en við skoðun á reikningum kemur fram að hluti upphæðarinnar var lagður inn á bankareikning Freezing Point aflandsfélagsins, sem reiðufé.
Þá vekur athygli að í ágúst 2014 er starfsmanni sænska Nordea bankans í Lúxemborg veitt umboð til að stýra félaginu fyrir Sigurð Gísla og ber sá starfsmaður sama nafn og sá sem sem skráður sem stjórnandi félagsins á Kýpur: Sveinn Helgason.
