Hæstiréttur Íslands staðfesti í morgun að Gunnar Örn Arnarson skyldi dæmdur í sextán ára fangelsi fyrir að hafa orðið Karli Birgi Þórðarsyni að bana á Akranesi í október í fyrra. Þetta kemur fram á vef RÚV.. Gunnar var ákærður fyrir að hafa orðið Karli Birgi að bana með því að herða að hálsi hans með höndum og með því að bregða beltisól og fatareim um hálsinn á honum og herða að. Karl Birgir lést fimm dögum eftir árásina.

Í frétt DV frá því í október 2015 segir að Gunnar hafi yfirgefið vettvang á meðan að lögreglu- og sjúkraflutningamenn reyndu endurlífgun á fórnarlambi árásarinnar. Þá hafi Gunnar verið handtekinn skömmu síðar þar sem hann var staddur á strætóbiðstöð á Akranesi. Var hann þá áberandi ölvaður og með rúmlega hálfa flösku af Jägermeister í fórum sínum. Í frétt Vísis er haft eftir saksóknara að Gunnar hafi hringt í eiginkonu sína og sagt: „Sæl, elskan. Hann er dauður. Ég elska þig.“

Samvæmt frétt RÚV fór Gunnar Örn fram á að dómurinn við héraðsdóm yrðir ómerktur með þeim rökum að mat héraðsdóms á munnlegum framburði sínum hafi verið rangur. Hæstiréttur bendir á að í þeim dómi kemur fram að framburður hans hafi frá upphafi verið ruglingslegur og á reiki um aðdraganda þess að Karl fannst meðvitundarlaus og með reim um hálsinn á heimili Gunnars.

„Hann hafi einnig orðið margsaga í fjölmörgum og veigamiklum atriðum um atburði þá sem urðu á heimilinu þennan dag, auk þess sem framburður ákærða beri þess skýr merki að hann hafi leitast við að laga framburðinn að nýjum upplýsingum eftir því sem þær komu fram,“ segir í dómi Hæstaréttar.